पाेखरा ।
पोखरा महानगरपालिकाले सार्वजनिक सडक किनारमा रहेका रुख विरुवा काट्नेलाई जरिवना गरेको छ । पोखरा—८ न्युरोडमा सडक छेउमा हुर्किएको रुख विना अनुमति काट्ने दुई वटा पसल महानगरको कारवाहीमा परेका हुन् ।
फुटपाथमा हुर्किएको रुख काट्ने गितार सप र स्काई फेसनलाई महानगरपालिकाको आर्थिक ऐन २०८० मा भएको व्यवस्था अनुसार कारबाही गरिएको महानगरपालिकाले जनाएको छ ।
पसल छेकिएको भन्दै अनुमति विना रुख नै काटेका उनीहरूलाई रु १५ हजार का दरले जरिवाना गरिएको नगर प्रहरी प्रमुख पुरुषोत्तम थापाले जानकारी दिनुभयो ।
महानगरको आर्थिक ऐनमा सडक छेउको फुटपाथमा लगाइएका रुखहरूको हाँगा अनुमति विना कटान गरेमा प्रति हाँगा रु पाँच हजार र रुख नै काटेमा रु १५ हजार जरिवाना हुने व्यवस्था गरिएको छ ।
महानगरपालिकाले आफ्नो चालू आर्थिक वर्षको नीति तथा कार्यक्रममानै पोखरामा एक घर दुई बिरुवाको नीति लिएको छ । चालू वर्षमा दुई लाख विरुवा रोप्ने पनि घोषणा गरिएको छ । महनगरले वृक्षरोपण कार्यलाई अभियानका रुपमा सञ्चालन गर्दै आएको छ ।
पोखरा महानगरपालिकाले पछिल्लो डेढ वर्षमा हजारौँ बिरुवाहरू वृक्षारोपण गरेको छ भने, त्यति नै सङ्ख्यामा फूलका बिरुवाहरू रोपिएका छन् ।
