काठमाडौँ २ जेठ।
दुई दिने नेपाल भ्रमणका क्रममा अस्ट्रेलियाली सहायक परराष्ट्र मन्त्री टिम वाट्स मंगलबार काठमाडौँ आइपुगेका छन् । नेपाल स्थित अस्ट्रेलियाली दूतावासका अनुसार यो भ्रमणका क्रममा अस्ट्रेलियाको नेपालसँगको गहिरो सम्बन्ध र भविष्यमा हुनसक्ने सहकार्यका विषयमा छलफल हुनेछ ।
भ्रमणका क्रममा सहायक मन्त्री वाट्सले प्रधानमन्त्री पुष्प कमल दाहाल र परराष्ट्र मन्त्री एन. पि साउदसँग शिष्टाचार भेट गर्नेछन् । दूतावासका अनुसार उनले भेटहरूमा नेपाल अस्ट्रेलिया सहकार्य, दौत्य सम्बन्ध र झाँगिँदो जनस्तरको सम्बन्धहरूको चर्चा गर्ने छन् ।
अस्ट्रेलियामा नेपाली समुदाय सबै भन्दा चाँडो बढिरहेको आप्रवासी जनसङ्ख्या भएको छ र हाल करिब एक लाख तीस हजार जना नेपालीहरू अस्ट्रेलियामा बसोबास गर्दछन् ।
