काठमाडौँ । निर्वाचन आयोगले मङ्सिर ४ गते हुने प्रतिनिधि सभा र प्रदेश सभा सदस्य चुनावका लागि निर्वाचनमा खटिने कर्मचारीले पनि मतदान गर्न पाउने व्यवस्था गरेकाे छ । चुनावका लगी एक सय ४१ वटा अस्थायी मतदान केन्द्र स्वीकृत गरेको छ ।
२०७२ सालमा लागू भएको नेपालको संविधानपछि अस्थायी मतदाताले मतदान गर्ने व्यवस्था पहिलो पटक कार्यान्वयनमा आएको हो । त्यही व्यवस्थाअनुसार मतदान केन्द्रमा खटिने कर्मचारी र सुरक्षाकर्मीलाई खटिएकै केन्द्रबाट मतदान गर्ने गरी व्यवस्था गरिएको आयोगले जनाएको छ । अस्थायी मतदाता हुनका लागि अन्तिम मतदाता नामावलीमा नाम समावेश भएको हुनुपर्ने कानुनी व्यवस्था रहेको छ ।
आयोगले एउटा जिल्लामा बढीमा आठ र घटीमा एक वटा अस्थायी मतदान केन्द्र स्वीकृत गरेको छ । अस्थायी मतदाताको सूचीमा चुनावमा खटिने कर्मचारी, सुरक्षाकर्मी, जेलमा बसेका कैदी बन्दी लगायत रहेका छन् ।
