काठमाण्डौं, भदौ ३१। राजधानीमा जारी महिला साफ च्याम्पियनसिप फुटबल प्रतियोगितामा घरेलु टोली नेपाल फाइनलमा प्रवेश गरेको छ । साफ महिला च्याम्पियनसिपमा नेपालले भारतमाथि ऐतिहासिक जित निकाल्दै फाइनलमा प्रवेश गरेको हो ।
घरेलु मैदान दशरथ रंगशालामा शुक्रबार साँझ भएको सेमिफाइनलमा नेपालले भारतलाई १-० गोलले हरायो । नेपालको जितमा रश्मिकुमारी घिसिङले निर्णायक गोल गरिन्।महिला साफ च्याम्पियनसिपको इतिहासमा नेपालले भारतलाई हराएको यो नै पहिलो पटक हो ।
पहिलो हाफको इन्जुरी समय सुरु भएको पहिलो मिनेटमा रश्मीले डी-बक्सभित्रबाट दोस्रो बार च्याप्दै गोल गरेकी थिइन् । मैदानको आफ्नै भागबाट आएको लङ पासमा उत्कृष्ट ड्रिबलिङ गर्दै प्रिति राईले रश्मीलाई पास उपलब्ध गराएकी थिइन् । खेलको सुरुवातमा भारतले दबाब बनाएपनि त्यसपछि नेपाल आक्रामक देखिएको थियो।
पछिल्ला ५ संस्करणको उपाधि विजेता भारत यो पटक भने सेमिफाइनलमा रोकिन पुग्यो ।
समूह चरणमा बंगलादेशसँग साफ इतिहासमै पहिलो हार व्यहोरेको भारत उप विजेताको रुपमा सेमिफाइनल प्रवेश गरेको थियो । नेपाल समूह विजेताको रुपमा सेमिफाइनलमा पुगेको हो ।नेपाल ५ मध्य चार पटक फाइनलमा पुग्दा सधैं भारतसँग स्तब्ध हुँदै उप विजेता बन्दै आएको छ । उपाधिको दावेदार मानिएको नेपालले सेमिफाइनलमा भारतलाई रोकेपछि उपाधि नजिक पुगेको छ ।
अब नेपालले बंगलादेशसँग उपाधिका लागि सोमबार खेल्ने छ । आजै भएको पहिलो सेमिफाइनलमा भुटानविरुद्ध ८-० गोलको फराकिलो जीत दर्ता गर्दै बंगलादेश दोस्रो पटक फाइनलमा पुगेको हो ।
