काठमाडौँ । नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले निर्वाचन प्रक्रिया स्वच्छ र निष्पक्ष रूपमा सम्पन्न भए आगामी चुनावमा आफ्नो दल अग्रणी शक्ति बन्ने विश्वास व्यक्त गरेका छन्।
शनिबार पार्टी प्रवेश कार्यक्रमलाई सम्बोधन गर्दै उनले पारदर्शी निर्वाचनले जनमतको सही अभिव्यक्ति हुने र त्यसको प्रति फलस्वरूप नेपाली कम्युनिस्ट पार्टी पहिलो स्थानमा पुग्न सक्ने दाबी गरे।
उनका अनुसार राजनीतिक संगठनलाई सुदृढ बनाउँदै लैजान सके मात्र राष्ट्रिय हित र जनताको चाहनाअनुसार काम गर्न सकिने अवस्था सिर्जना हुन्छ। पार्टी निर्माण र संगठन विस्तारलाई प्राथमिकतामा राख्नुपर्नेमा उनले जोड दिए।
प्रचण्डको सचिवालयका अनुसार सो अवसरमा विभिन्न दल परित्याग गर्दै ५२ जना युवाहरू नेपाली कम्युनिस्ट पार्टीमा आबद्ध भएका छन्।
