काठमाडौं । अन्तिम समयमा स्टेफन समीर बिनोङले गरेको गोल निर्णायक बन्दा धनगढी एफसीविरुद्ध १-० को जित निकाल्दै पोखरा थन्डर्स नेपाल सुपर लिग (एनएसएल) को फाइनलमा प्रवेश गरेको छ ।
पोखराले उपाधिका लागि साबिक विजेता ललितपुर सिटी एफसीको सामना गर्नेछ ।
त्रिपुरेश्वरस्थि दशरथ रंगशालामा सम्पन्न दोस्रो क्वालिफायरमा पोखरालाई जित दिलाउन बिनोङले इन्जुरी समयमा गोल गरेका थिए । उनले आयुश घलानको कर्नरलाई हेडमार्फत पोस्टको दिशा दिए ।
रक्षक गौरव श्रेष्ठले ८३औं मिनेटमा दोहोरो पहेंलो कार्ड बेहोर्दै मैदान छाडेपछि पोखरा १० खेलाडीमा समेटिएको थियो ।
पहिलो क्वालिफायरमा धनगढी ललितपुर सिटी एफसीसँग २-१ ले पराजित भएको थियो । पोखराले भने इलिमिनेटरमा एफसी चितवनमाथि ३-० को सहज जित निकालेको थियो ।
फाईनल खेल आगामी सनिबार दशरथ रंगशालामा हुँदैछ ।
