धादिङ्ग- सामाजिक संस्था टिम नेपोले आफ्नो ‘पुस्तक परियोजना’ कार्यक्रम अन्तर्गत आज धादिङ जिल्ला कारागारमा ५१५ थान पुस्तक हस्तान्तरण गर्दै १० कारागारहरूमा सफलतापूर्वक पुस्तकालय पुनःस्थापना गरेको छ।
यस अभियानले नेपालका विभिन्न जिल्लाका कारागारहरूमा पुस्तकालय स्थापना गरी कैदीहरूलाई पुनर्स्थापना, मानसिक स्वास्थ्य प्रवर्द्धन तथा शिक्षाको पहुँच पुर्याउँदै आएको छ।
कार्यक्रममा टिम नेपोका अध्यक्ष प्रदीप गिरीले कारागार कार्यालय धादिङका प्रमुख राममणि मिश्रलाई पत्रसहित विभिन्न विधाका ५१५ थान पुस्तक हस्तान्तरण गरे। उनले यस पुस्तक परियोजनाले कैदीहरूलाई पुनर्स्थापना र आत्मसुधारको अवसर प्रदान गर्ने विश्वास व्यक्त गरे। अध्यक्ष गिरीले पुस्तकको सही सदुपयोग गर्दै कैदीहरूबीच पठन संस्कृतिको विकास गर्ने लक्ष्य रहेको बताए। पढाइले मात्रै नयाँ अवसर र परिवर्तनको ढोका खोल्ने भन्दै उनले आगामी दिनमा अन्य जिल्लाहरूमा पनि यो अभियानलाई निरन्तरता दिने प्रतिबद्धता जनाए।
प्रमुख जिल्ला अधिकारी सुमन घिमिरेले कार्यक्रममा बोल्दै टिम नेपोले अघि बढाएको यो अभियान कारागार सुधारको उत्कृष्ट पहल भएको बताए। उनले यस्तो कार्यक्रमले कैदीहरूलाई जीवन परिवर्तनको बाटो देखाउने र सकारात्मक सोचको विकास गर्ने विश्वास व्यक्त गरे। प्रहरी उपरीक्षक दिपेन्द्र शाहीले पनि यस परियोजनाको प्रशंसा गर्दै शिक्षा र पठन संस्कृतिको प्रवर्द्धनले कैदीहरूको मानसिक स्वास्थ्यमा सुधार ल्याउने र समाजमा पुनर्स्थापना प्रक्रियालाई सहज बनाउने बताए।
अष्ट्रेलियास्थित सामाजिक संस्था ‘नेपा’ को सहकार्यमा सम्पन्न उक्त कार्यक्रममा टिम नेपोका कार्यकारी सदस्य प्रवेश पण्डित, टिम नेपो काठमाडौंका संयोजक निराजन अधिकारी, सदस्य एलिश धरेल, किरण ओली र पारश क्षेत्री पनि उपस्थित थिए ।
टिम नेपोले यसअघि अर्घाखाँची, स्याङ्जा, तनहुँ, अछाम, चितवन, दाङ, रसुवा, लमजुङ र काभ्रे कारागारहरूमा पनि पुस्तकालय स्थापना गरिसकेको छ।
