बागमती प्रदेशको राजधानीसमेत रहेको हेटौँडा उपमहानगरपालिकाले चालू आवको ८ महिनामा ३३ प्रतिशतमात्र बजेट खर्च गरेको छ। उपमहानगपालिकाले आव ०८१/८२ को साउनदेखि फागुनसम्म ३३ दशमलव ६५ प्रतिशतमात्र खर्च गरेको हो।
उपमहानगरले आव ०८१/८२ का लागि संशोधनसहित २ अर्ब ७२ करोड रुपैयाँको बजेट पारित गरेको थियो। जसमध्ये ८५ करोड २ लाख ६७ हजार ७७७ रुपैयाँमात्र खर्च भएको हो।
उपमहानगरको पुँजीगत खर्चभन्दा चालू खर्च धेरै देखिएको छ। उपमहानगरले ८ महिनामा चालूतर्फ ७० करोड १२ लाख ५४ हजार १४८ रुपैयाँ अर्थात ४१ दशमलव ८१ प्रतिशत खर्च गरेको छ।
पुँजीगततर्फ १४ करोड ५० लाख ३९ हजार ९२२ रुपैयाँमात्र अर्थात १७ दशमलव २८ प्रतिशतमात्र खर्च भएको उपनगरपालिकाका सूचना अधिकारी भानुभक्त थपलियाले जानकारी दिए।
वित्तिय व्यवस्थातर्फ ३९ लाख ७३ हजार ७०६ अर्थात ३९ दशमलव ७४ प्रतिशत खर्च भएको उनले बताए।
उपमहानगरपालिकाले प्रशासनिक दण्ड जरिवाना र जफतबाट २० लाख रुपैयाँ राजश्व संकलन गरेको छ। धरौटीमार्फत २० हजार, अन्य राजश्वमार्फत २ लाख ५० हजार र १ करोड ६३ लाख ९९ हजार ३ सय रुपैयाँ राजश्व संकलन गरेको छ।
साथै बेरुजुवापत ३ लाख, बैंक मौज्दात १७ करोड ६० लाख र अन्य संस्थाहरुबाट प्राप्त ३ करोड ६० लाख रुपैयाँ प्राप्त भएको उपमहानगरपालिकाले जनाएको छ।
