पोखरा महानगरपालिका–२१ का वडाध्यक्षलाई रड प्रहार गर्ने व्यक्तिमाथि अनसुन्धान गर्न ७ दिन म्याद थप भएको छ ।
सार्वजनिक जग्गा अतिक्रिमण रोक्न पुगेका वडाध्यक्ष दीपक सुवेदीमाथि गत शनिबार स्थानीय ६९ वर्षीय भूपेन्द्र गिरीले रड प्रहार गरेका थिए । जिल्ला प्रशासन कार्यालयले गिरीलाई अभद्र व्यवहारसम्बन्धी मुद्दामा हिरासतमा राखेर अनुसन्धान गर्न सोमबार ७ दिनको समय दिएको जिल्ला प्रहरी कार्यालय कास्कीले जनाएको छ ।
वडाध्यक्ष सुवेदीको उजुरीपछि वडा प्रहरी कार्यालय बैदामले गिरीलाई आइतबार सम्पर्क गरेको थियो । आइतबार नै कार्यालयमा हाजिर भएपछि प्रहरीले उनलाई नियन्त्रणमा लिएको थियो । मुलुकी अपराध संहिता, २०७४ को दफा ११८ को उपदफा २ मा अभद्र व्यवहार गर्ने व्यक्तिलाई १ वर्षसम्म कैद र १० हजार रुपैयाँसम्म जरिवाना हुन सक्ने व्यवस्था छ ।
