ऋषिङ्ग गाउँपालिकाले गाउँवासीको स्वास्थ्यलाई प्राथमिकतामा राख्दै फागुन ५ गतेदेखि ८ गतेसम्म वडा नं. ४ भीरकोट स्थित भीरकोट स्वास्थ्य चौकीमा वृहत् निःशुल्क स्वास्थ्य शिविर सम्पन्न गरेको छ। उक्त स्वास्थ्य शिविर वि.पी. नेत्र प्रतिष्ठान, लोकन्थली भक्तपुरको सहकार्यमा आयोजना गरिएको थियो।
चार दिनसम्म सञ्चालन गरिएको स्वास्थ्य शिविरको नेतृत्व प्रतिष्ठानकी वरिष्ठ नेत्र रोग विशेषज्ञ डा. सरिता मानन्धरले गर्नुभएको थियो। शिविरमा प्रतिष्ठानका चार जना दक्ष चिकित्सकसहित १३ जनाको मेडिकल टोली सहभागी रहेको थियो। उनीहरूलाई ऋषिङ्ग गाउँपालिकाका स्वास्थ्यकर्मी तथा जनप्रतिनिधिहरूले सहजीकरण गरेका थिए।
उक्त स्वास्थ्य शिविरको लागि कुनै पनि निकायबाट आर्थिक सहयोग प्राप्त भएको थिएन। सम्पूर्ण बजेट ऋषिङ्ग गाउँपालिकाबाट नै विनियोजन गरिएको थियो, जसको कुल बजेट रु. ६ लाख रहेको थियो।
गाउँपालिकाले स्वास्थ्य सेवामा पहुँच सुनिश्चित गर्न बिरामीहरूको आवतजावतलाई सहज बनाउन चारवटा यातायातका साधनको व्यवस्था गरेको थियो। यस व्यवस्थाका कारण गाउँपालिकाका विभिन्न टाढाका स्थानहरूबाट समेत सेवाग्राही सहजै शिविरमा पुग्न सफल भएका थिए।
चार दिनसम्म सञ्चालन भएको शिविरमा जम्मा १,५०४ जना सेवाग्राहीले विभिन्न स्वास्थ्य सेवा प्राप्त गरेका थिए।
दन्त सेवा : ३७४ जनाले सेवा लिएका छन्।
नाक, कान, घाँटी सेवा : ४८० जनाले सेवा लिएका छन्।
आँखा सेवा : ६५० जनाले सेवा लिएका छन्।
आँखा शल्यक्रिया : १०३ जनाको सफल शल्यक्रिया गरिएको छ।
गाउँपालिकाका स्थानीयहरूका अनुसार यस शिविरले उनीहरूको समय र आर्थिक खर्चमा ठूलो बचत गराएको छ। स्थानीय सरकारको यस्तो पहलबाट ऋषिङ्ग गाउँपालिकावासी निकै प्रसन्न देखिएका छन्।
ऋषिङ्ग गाउँपालिकाका प्रमुख प्रशासकीय अधिकृतले शिविरको सफल सञ्चालनमा योगदान दिने सबै चिकित्सक, स्वास्थ्यकर्मी, स्वयंसेवक तथा जनप्रतिनिधिहरूलाई धन्यवाद ज्ञापन गर्दै आगामी दिनमा पनि यस्ता सेवा मूलक कार्यक्रमहरू सञ्चालन गर्ने प्रतिवद्धता व्यक्त गर्नुभएको छ।
