चौथो ऋषिङ अल्ट्रा म्याराथन–२०८१ प्रतियोगिताको उपाधि त्रिभुवन आर्मी क्लबका होमलाल श्रेष्ठले जितेका छन् ।
तनहुँ जिल्लाको ऋषिङ गाउँपालिकाले शनिबार सम्पन्न गरेको म्याराथन प्रतियोगिताको ४२ दशमलव २ किलोमिटर दूरी २ घण्टा ५७ मिनेट ४४ सेकेण्डमा पार गर्दै श्रेष्ठले उपाधि जितेका हुन् । यस्तै, उक्त दूरी २ घण्टा ५९ मिनेट ३६ सेकेण्डमा पार गर्दै आर्मी क्लबकै राजेन मेन्योङ्बो द्वितीय भएका छन् भने आर्मीकै जुनेश खड्काले २ घण्टा ५९ मिनेट ५९ सेकेण्डमा उक्त दूरी पार गर्दै तृत्तीय हुन सफल भए । प्रतियोगितामा ३२ धावक सहभागी थिए ।
ऋषिङ गाउँपालिकाको प्रवेशद्वार वडा नं. ८ को धारुङदेखि वडा नं. ३ को दुबुङ भ्यूटावरसम्म गरिएको प्रतियोगिताको प्रथमलाई ६५ हजार, द्वितीयलाई ४० हजार, तृतीयलाई २५ हजार र सान्त्वना हुनेलाई १० हजार रुपैयाँ नगद र प्रमाणपत्र प्रदान गरिएको छ ।
यस्तै, प्रतियोगितामा सहभागी स्थानीय धावकहरुलाई प्रोत्साहन गर्न गाउँपालिकाले अन्तिम विन्दुसम्म पुग्ने प्रथम, द्वितीय र तृतीय हुने धावकलाई क्रमशः ५ हजार, ४ हजार र ३ हजार रुपैयाँ पुरस्कार प्रदान गरेको छ ।
गत वर्ष आयोजित तेस्रो ऋषिङ अल्ट्रा म्याराथनको उपाधि त्रिभुवन आर्मी क्लबका गोविन्द कार्कीले जितेका थिए । प्रतियोगितामा त्रिभुवन आर्मी क्लबकै गोपाल तामाङ द्वितीय, तिलकबहादुर सुनुवार तृतीय र काठमाडौंका करण रावल चौथो भएका थिए ।
गाउँपालिकाको विकाससँगै खेलकुदको माध्यमबाट पालिकालाई राष्ट्रिय तथा अन्तर्राष्ट्रियस्तरमा चिनाउने उद्देश्यले अल्ट्रा म्याराथन प्रतियोगिता गरिएको गाउँपालिकाका अध्यक्ष राजेन्द्रकृष्ण श्रेष्ठले बताए ।
