पछिल्लो समय गण्डकी प्रदेशमा डेंगी संक्रमण झनै तिब्र बनेको छ। अघिल्लो महिनासम्म तनहुँमा संक्रमण तिब्र रहेकोमा अहिले कास्कीमा संक्रमण बढिरहेको छ। कास्कीको पोखरा अहिले डेंगी संक्रमणको ‘हटस्पट’ बनेको प्रदेशको स्वास्थ्य मन्त्रालयले बताएको छ। पर्यटकीय सहर पोखरामा दिनहुँ संक्रमण बढिरहेको मन्त्रालयको भनाई छ।
एडिस जातको लामखुट्टेको टोकाइबाट डेंगी सर्ने गर्छ। स्वास्थ्यकर्मीले अहिले पनि डेंगी संक्रमण असोज महिनाभर नै रहिरहने अनुमान गरेका छन्। गण्डकीमा यो वर्ष डेंगीका झन्डै सातहजार संक्रमित पुगिसकेका छन्। तीमध्ये पाँचजनाको ज्यान गएको पनि मन्त्रालयको भनाई छ। मन्त्रालयका प्रवक्ता सुरज गुरौका अनुसार योवर्ष बुधबारसम्म गण्डकीमा ६ हजार ९ सय ७ जनामा संक्रमण पुष्टि भएको छ।
‘पछिल्लो समय पोखरामा संक्रमण तिब्र बनेको छ। पोखरा अहिले प्रदेशकै डेंगीको हटस्पट हो,’ प्रवक्ता गुरौले भने, ‘अगष्ट महिनामा मात्र गण्डकीमा झन्डै चारहजार संक्रमित थपिएका थिए। सेप्टेम्बरको अहिलेसम्म २ हजार जनामा संक्रमण देखिएको छ।’ उनका अनुसार यो वर्ष अहिलेसम्म कास्कीमा सबैभन्दा बढी ३ हजार १ सय ८४ जनामा संक्रमण पुष्टि भएको छ। प्रदेशमा सबैभन्दा बढी संक्रमित पोखरामा छन्।
त्यसपछि तनहुँमा २ हजार ७९ जनामा संक्रमण पुष्टि भएको छ । त्यस्तै पर्वतमा ६ सय ४, गोरखामा ३ सय १९ जनामा संक्रमण पुष्टि भएको छ। स्याङजामा २ सय ७९, बागलुङमा १ सय ७६, लम्जुङमा ८९, म्याग्दीमा पनि ८९, नवलपुरमा ८६ र मनाङमा २ जनामा संक्रमण पुष्टि भएको मन्त्रालयका प्रवक्ता गुरौले बताए। प्रदेशभित्र सबैभन्दा बढी संक्रमित रहेको कास्कीको पोखरा महानगरपालिकामा मात्र ३ हजार १ सय ४ जनामा संक्रमण पुष्टि भएको छ। त्यसपछि तनहुँको आँबुखैरेनी गाउँपालिकामा १२ सय ६८ जनामा संक्रमण पुष्टि भएको उनले जानकारी दिए।
