भारत कोलकाताको आरजी कर मेडिकल कलेजमा ट्रेनी डाक्टरको बलात्कारपछि हत्याको घटनामा डाक्टरहरूकाे विरोध प्रदर्शनमा १४-१५ अगस्टको मध्यरात भीडले हिंसा मच्चाएको छ । डाक्टरहरूले विरोध प्रदर्शन गरिरहेका बेला अज्ञात भीडले अस्पताल परिसरमा प्रवेश गरी प्रदर्शन स्थल, वाहन र सार्वजनिक सम्पत्ति तोडफोड गरेको हो ।
बीबीसी हिन्दीका अनुसार, कोलाकाता प्रहरीका अनुसार, यो सबै गलत मिडिया क्याम्पेनका कारण भएको हो । यद्यपि, भीडलाई प्रहरीले राति नै तितर-बितर पारेको थियो ।
यसैबीच पश्चिम बंगालको सत्ताधारी पार्टी तृणमूल कांग्रेसका राष्ट्रिय महासचिव एवम् लोकसभा सदस्य अभिषेक बनर्जीले आरजी करमा गुण्डागर्दी र बर्बरताले सबै स्वीकार्य सीमाहरू नाघेको बताएका छन् । उनले हिंसाको घटनामा संलग्न मानिसहरूलाई २४ घण्टाभित्र पहिचान गरी कारबाही थालिने प्रतिबद्धता जनाए ।
प्रतिपक्षी दलका नेता शुभेन्दु अधिकारीले आक्रमणकारीहरू तृणमूल कांग्रेसका गुण्डा रहेको आरोप लगाएका छन् ।
