९ माघ, तनहुँ । पर्यटन प्रबर्द्धन गर्न मानहुँदेखि-पुलिमराङसम्म अल्ट्रा म्याराथन गरिने भएको छ । खेलकूदको माध्यमबाट पर्यटन प्रवद्र्धन गर्ने उद्देश्यसहित व्यास नगरपालिकाले शहिद दिवसको अवसर पारेर माघ १६ गते सातौं व्यास नगर अल्ट्रा म्याराथन आयोजना गरेको हो । ‘पर्यटन, धार्मिक एवं ऐतिहासिक क्षेत्रको पहिचान व्यास नगरपालिकाको अभियान’ भन्ने नाराका साथ प्रतियोगिता आयोजना गरिएको नगर प्रमुख वैकुण्ठ न्यौपानेले पत्रकार सम्मेलनमा जानकारी दिए ।
उनले पर्यटकीय क्षेत्रको प्रचारप्रसार गर्ने उदेश्यले प्रतियोगिता गरिदै आएको बताए । व्यास नगरपालिका–५ मानहुँबाट शुरु हुने म्याराथन व्यास नगरपालिका-८ पुलिमराङसम्म ४४ किमी दूरीको रहनेछ । म्याराथन मानहुँको सिद्ध मार्ग हुँदै अलैचे – चापाघाट- अनसन चौतारी-सफासडक-भोर्लेटार चोक- बैरेनी- दुम्सी – कलेस्ती- पाथ्रा – सत्रसय – बानियाँ डिही- — बर्लाची-सोतीवेशी-बगुवा रिस्ती – बाहुन पोखरा हुँदै पुलिमराङमा पुगेर अल्ट्रा म्याराथनको समापन हुनेछ । प्रतियोगितामा प्रथम हुने धावकले नगद ८५ हजार ८०, द्वितीय हुनेले ६५ हजार ८० र तृतीय हुने धावकले ५५ हजार ८० रुपैयाँ प्राप्त गर्नेछन् । त्यस्तै ५ जनालाई सान्त्वना पुरस्कार १६ हजार ८० का दरले प्रदान गरिने व्यास नगरपालिकाका प्रवक्ता जीवन गुरुङले जानकारी दिए ।
