प्रधानमन्त्री दाहाललाइ पौडेलको अपिल : चिसोले नागरिकको स्वास्थ्य अवस्था जटिल भयो सुरक्षित स्थानमा सारौं

७ मंसिर, जाजरकोट । काङ्ग्रेस नेता प्रदीप पौडेलले प्रधानमन्त्री पुष्पकमल दाहाल प्रचण्डलाई जाजरकोटबासीको स्वास्थ्य अवस्था भयाबह बन्दै गएकाले छिटोभन्दा छिटो सुरक्षित स्थानमा स्थानान्तरण गर्न पहल गर्नुपर्ने बताएका छन् । बिहिवार सामाजिक सन्जालमार्फत पौडेलले प्रधानमन्त्री प्रचण्डलाई अपिल गरेका हुन् ।

भुकम्पले क्षेती पुगेको जाजरकोटमा अस्थायी टहरा निर्माणका लागि नेपाली काङ्ग्रेसले प्रदीप पौडेलको नेतृत्वमा एक टोली त्यस क्षेत्रमा पठाएको थियो । केन्द्रिय कार्यसमितिले निर्णय गरेपछि पौडेल सहित इन्जिनियर र प्राबिधिकसहितको टोली शनिबार जाजरकोट प्रस्थान गर्यो । त्यहाँ पुगेर अस्थायी टहरा निर्माणमा अग्रसर भयो । तर केही दिनदेखि त्यस क्षेत्रमा चिसो बढ्दै गएपछि स्थानीयहरु बिरामी पर्न थाले ।

सुत्केरी, वृद्धवृद्धा र बालबालिका प्रभावित हुन थाले । त्यसपछि अवस्था जटिल बन्दै गएको भन्दै प्रदीप पौडेलले प्रधानमन्त्री प्रचण्डलाई अपिल गरेका हुन् । पौडेलले भनेका छन् । यहाँको अवस्था अत्यन्तै नाजुक छ । अधिकांश घर क्षतविक्षत छन् । चिसो बढ्दै गएको छ । बिरामी, सुत्केरी, बालबालिका र वृद्धवृद्धाको स्वास्थ्य अवस्था झनै जटिल बन्दै गएको छ । धेरै जसो परिवारसँग न्यानो लत्ता कपडा समेत छैन । यहाँका नागरिकलाई चिसोबाट जोगाउन तुरुन्तै अस्थाई टहरा निर्माण गरेर सुरक्षित स्थानमा स्थानान्तरण गर्नुपर्छ होइन भने पुसको ठण्डीमा जीवन रक्षा गर्न सकिँदैन ।

जाजरकोटबाट प्रदीप पौडेलले प्रधानमन्त्री प्रचण्डलाई गरेको अपिल

हार्दिक अपिल ! सम्माननीय प्रधानमन्त्री ज्यू । हामी जाजरकोटमा छौं । यहाँको अवस्था अत्यन्तै नाजुक छ । अधिकांश घर क्षतविक्षत छन् । चिसो बढ्दै गएको छ । बिरामी, सुत्केरी, बालबालिका र वृद्धवृद्धाको स्वास्थ्य अवस्था झनै जटिल बन्दै गएको छ । धेरै जसो परिवार सँग न्यानो लत्ता कपडा समेत छैन । यहाँका नागरिकलाई चिसोबाट जोगाउन तुरुन्तै अस्थाई टहरा निर्माण गरेर सुरक्षित स्थानमा स्थानान्तरण गर्नुपर्छ होइन भने पुसको ठण्डीमा जीवन रक्षा गर्न सकिँदैन ।

सरकारले भूकम्पबाट प्रभावित नागरिकलाई तत्काल पचास हजार रुपैयाँ दिने घोषणा गरेको थियो । घोषणा गरेको सहयोग रकम अझै सम्म पनि भुकम्प पीडित जनताको हातमा पर्न सकेको छैन । यहाँको स्थानीय प्रशासनबाट प्राप्त जानकारी अनुसार उक्त सहयोग रकम हस्तान्तरण गर्न अझै दुई हप्ता लाग्ने भनिएको छ । एक त सहयोगका लागि धेरै नै ढिला भई सकेको छ भने अर्कोतिर अझै दुई हप्ता लाग्ने विषयले सरकारको ध्यान आफ्ना नागरिकमा भन्दा धरै सत्ता लिप्सामा देखिन्छ । मंसिर ७ काे चटारोले सरकारलाई भ्याई नभ्याई नै होला । थोरै समय निकालेर भए पनि यहाँका नागरिकको जीवन रक्षा गर्ने सवाललाई ध्यान दिन आग्रह गर्दछु । यस विषयलाई पहिलो प्राथमिकतामा राखेर अत्यन्तै गम्भीरतापूर्वक आवश्यक कदम चाल्न सरकारलाई सचेत समेत गराउँछु ।