२१ भदौ, काठमाडौ । चर्चित कलाकार पशुपति शर्मा र कला लम्सालले अस्ट्रेलियाको मेलबर्न सहरका दिदिबहिनीहरुलाई तीज गीत गाएर मनोरंजन दिएका छन् । केही लिन अगाडि अस्टेलिया पुगेका उनीहरुले हरिकालिका तिजको अवसरमा अस्ट्रेलियाको मेलबर्न सहरमा बसोबास गर्ने नेपाली दिदिबहिनीहरुलाई विभिन्न थरिका गित गाएर रमाइलो गरेका हुन् ।
गायक शर्माले लौरी हरायो, स्याङ्जा जाने बाटो, अमेरिका यहि लगायतका गित गाएका थिए । उनको प्रस्तुतीमा सबैजना सँगसँगै नाच्दा माहोल तातेको थियो । त्यस्तै लम्सालले पनि विभिन्न किसिमका लोक तथा तीज गीत गाएर दर्शकलाई नचाएकी थिइन् । उनले छड्के तिलहरी गीत गाउने बित्तिकै उपस्थित भएकाहरु नाचगानमा मस्त भएका थिए ।
लम्सालले पातली, चरिभरर सहित दर्जनौ गित गाएर दर्शक दिर्घालाई नचाएकी थिइन् । ख्यतिप्राप्त कलाकार आएका कारण त्यहाँ बस्ने नेपालीहरुको उल्लेख्य सहभागीता रहेको थियो । तीजमा नारीहरुको कथालाई यथार्थ चित्रण गरिने गीतहरुको प्रस्तुती भएकाले पनि त्यहाँ उपस्थित भएकाहरुले भरपुर मनोरन्जन लिएका थिए । तीज गीत गाएर दिदिबहिनीलाई मनोरन्जन दिन पाएकोमा खुशी लागेको गायिका लम्सालले बताइन् ।
