२३ साउन, तनहुँ । पृथ्वी राजमार्ग सडक खण्डको छिर्कनेमा सडक भासिएपछि अवरुद्ध राजमार्ग संचालनमा आएको छ । केही दिनदेखि परेको अविरल वर्षाका कारण व्यास नगरपालिका— १३ छिर्कनेमा मंगलबार सडक नै भासिदा राजमार्ग अवरुद्ध भएको थियो । बाटो बन्द भएपछि ठुला तथा साना सवारी साधन घन्टौ जाममा परेका थिए ।
निरन्तरको वर्षाले सडक भासिएर केही समय राजमार्ग अवरुद्ध भएको जिल्ला प्रहरी कार्यालय तनहुँका प्रहरी उपरीक्षक अवदेश विष्टले बताए । उनले भने, सडक भासिएको थाहा पाउने बित्तिकै प्रहरीको टोली उक्त क्षेत्रमा पुगेको थियो । त्यसपछि सडक संचालनमा ल्याउन तत्कालै एक्साभेटर प्रयोग गरि बाटो खुलाउने प्रयास भयो । ‘त्यसपछि एकतर्फी संचालनमा ल्याएका छौ । तर मालबाहक र ठुला सवारी साधन भने आवतजावत गर्न समस्या छ,’ उनले भने ।
छिर्कनेमा डाइभर्सन गराउन मिल्ने ठाउँ समेत नहुँदा राजमार्ग सुचारु गर्न समय लागेको थियो । भासिएको ठाउँमा खोल्सा भएकाले पनि बाटो बनाउन समस्या भएको हो । त्यस ठाउँमा दुई तर्फी सवारी साधन आवतजावत गराउन मिल्ने अवस्था पनि छैन । ठुला तथा मालवाहक सवारी साधन आवतजावत नर्गन जिल्ला प्रशासन कार्यालय तनहुँले सुचना नै जारी गरेको छ । मुग्लिन देखि नै मालबाहक सवारी साधन प्रवेशमा रोक लगाइएको प्रहरी उपरीक्षक विष्टले बताए । ‘हामीले हेभी सवारी साधन प्रवेशमा रोक लगाइसकेका छौ । मुग्लिन र पोखरादेखि आउने त्यस्ता सवारी साधन नचलाउन भनेका छौ,’ उनले भने ।
निरन्तरको बर्षाले राजमार्गको ठाउँठाउँमा पहिरो गएको छ । खैरेनीटारमा पनि पहिरो जाँदा केहिबेर सडक अवरुद्ध भएको थियो । त्यस्तै निरन्तरको वर्षाले नदीको बहाव बढ्दै गएकाले नदी आसपास क्षेत्रमा बसोबास गर्ने मानिसहरुलाई शतर्कता अपनाउनको लागि अनुरोध गरिएको सहायक प्रमुख जिल्ला अधिकारी काशी राम गैरेले बताए ।
