जिरी (दोलखा) । बरिष्ठ पत्रकार एवँ समाजसेवी इश्वरी न्यौपानेले आफ्ना स्वर्गीय बुबाको स्मृतिमा छात्रवृत्ति कोष स्थापना गर्नुभएको छ ।
बरिष्ठ पत्रकार न्यौपानले दोलखाको जिरी नगरपालिकास्थित जिरी माविमा छात्रवृत्ति कोष स्थापना गर्नुभएको हो । जिरी नगरपालिका वडा नम्बर ६ स्थायी घर भई हाल अमेरिकामा बसोबास गर्दै आएका न्यौपानेले आफ्ना स्वर्गीय बुबा श्रीप्रसाद न्यौपानेको स्मृतिमा १ लाख १ हजार १ सय ११ रुपैयाँको कोष स्थापना गर्नुभएको हो । पत्रकार न्यौपाने, उहाँकी आमा पार्वती, श्रीमति कविता र बहिनी शुसिलाले जिरी माविका प्रधानाध्यापक कुमार जिरेललाई कोष स्थापनाकालागि एक कार्यक्रमका वीच आज सामूहिकरुपमा रकम हस्तान्तरण गर्नुभयो । कार्यक्रममा जिरी नगरपालिकाका नगर प्रमुख मित्रवहादुर जिरेल, उपप्रमुख कृष्णमाया खड्का बुढाथोकी र बिद्यालयका पूर्व प्रधानाध्यापक केशवकुमार कार्कीको पनि उपस्थिती थियो ।
पत्रकार न्यौपानेले स्थापना गरेको कोषबाट प्राप्त रकमवाट कक्षा ११ मा सर्वोत्कष्ट हुने विद्यार्थीलाई वार्षिक १० हजार छात्रवृत्ति प्रदान गरिने जिरी माविका प्रधानाध्यापक जिरेलले जानकारी दिनुभयो । उहाँका अनुसार सर्वोत्कृष्ट नतिजा ल्याउने विद्यार्थीलाई कक्षा १२ मा अध्ययनका लागि थप सहयोग पुग्नेछ । जिरी माविका पूर्व बिद्यार्थी समेत रहेका पत्रकार न्यौपानेले स्वर्गीय बुबाको सम्मानस्वरुप कक्षा ११ मा नयाँ भर्ना हुने विद्यार्थीलाई पढाईमा थप सहयोग पुगोस् भन्ने उद्धेश्यले छात्रवृत्ति कोष स्थापना गरिएको बताउनुभयो ।
नेपालमा रहँदा लामो समय कान्तिपुर दैनिकमा पत्रकारिता गरेका पत्रकार न्यौपाने हाल सपरिवार अमेरिका बस्दै आउनुभएको छ ।
