पाेखरा ।
पोखरा महानगरपालिका– १२ मा निशुल्क चस्मा वितरण गरिएको छ । वडा कार्यालयले मंगलबार १७ जनालाई निशुल्क चस्मा वितरण गरेको हो । नेपाल रेडक्रस सोसाइटी पोखरा महानगरपालिका– १२ उपशाखाद्धारा ११ पुसमा वडामा आँखा शिविर गरिएको थियो ।
शिविरमा परिक्षण गराएका ३१२ जना मध्ये १७ जनालाई चस्मा लगाउनुपर्ने समस्या देखिएकाले मंगलबार वडामै उनीहरुलाई चस्मा प्रदान गरिएको वडाध्यक्ष सन्तोष बास्तोलाले बताए । शिविरमा गरिएको परिक्षणमा चस्मा लगाउनुपर्ने समस्या भएकालाई आज वडामै चस्मा दिएर सेवा गरेको उनले बताए ।
मानिसको संवेदनशील अंग मानिने भएकाले वडा कार्यालयको समन्वयमा नेपाल रेडक्रस सोसाइटीले पुसमा आँखा शिविर संचालन गरेको थियो । रेडक्रस सामाजिक सेवा भाव लिएर काम गर्ने संस्था भएकाले समयसमयमा शिविर गरिदै आएको नेपाल रेडक्रस उपशाखाका सभापती कुश्मराज आचार्यले बताए । कार्यक्रम संयोजक गोविन्द प्रसाद घिमिरेले स्थानीयलाई गाउँ घरमै गएर सेवा दिइएको बताए ।
