पाेखरा १४ माघ ।
पोखरा महानगरपालिका वडा नम्वर १२ र नेपाल नर्सिङ संघ कास्कीको संयुक्त आयोजनामा महिलाको पाठेघर ‘र स्तन क्यान्सरको परीक्षण गरिएको छ । शनिवार वडा कार्यालयले एक दिने स्वास्थ्य शिविर र सचेतना कार्यक्रम संचालन गरेको हो । शिविरमा ३० वर्षभन्दा माथिका महिलाहरुले स्वास्थ्य परीक्षण गराएका थिए ।
वडा कार्यालय परिसरमा शिविर संचालन गरिएको वडाध्यक्ष सन्तोष वास्तोलाले बताए । ‘घरदैलोमै स्वास्थ्य सेवा दिने उदेस्यले शिविर संचालन गरिएको हो । पछिल्लो समय महिलाहरुले परीक्षण गर्न लाज मान्ने तथा रोग लुकाएर बस्ने पनि पाइएको छ । त्यस्ता महिलाहरुका लागि सहयोग पुगोस् भन्ने उदेस्यले पाठेघर र स्तन क्यान्सरको परीक्षण वडामै मिलाएका हौ,’ उनले भने ।
शिविरले स्थानीय लाभान्वित भएका छन् । एक दिने शिविरमा प्रोजेक्टरमार्फत पुजा भण्डारीले सचेतना कार्यक्रमको प्रस्तुती गरेकी थिइन् । स्थानीयको सहजताका लागि वडामै गरिएको स्वास्थ्य शिविरले स्थानीय लाभान्वित भएको नेपाल नर्सिङ संघ कास्कीका अध्यक्ष मुना सिलवालले बताइन् ।
पछिल्लो समय महिलाहरु उपचार गराउन लाज मान्ने, डराउने भएकाले पनि पाठेघरको समस्या बढ्दै गएको हो । महिलाहरुको रोगको उपचारको लागि वडा कार्यालयले शिविर संचालन गरेर परीक्षणमा सघाउ पुगेको कार्यक्रम संचालिका मिनु श्रेष्ठले बताइन् ।
शिविरमा शहरी स्वास्थ्य केन्द्रका कर्मचारीहरुले सहजीकरण गरेका थिए । यस्ता खालका शिविरहरु समयसमयमा संचालन गर्न सके न्युनीकरणमा सहयोग पुग्ने वडाध्यक्ष वास्तोलाले बताए
