१ मसिर ।
नेपाली कांग्रेसका वरिष्ठ नेता तथा तनहुँ–१ बाट प्रतिनिधि सभाका उमेदवार रामचन्द्र पौडेलले आफू प्रधानमन्त्री बन्नको लागि उम्मेदवार बनेको बताएका छन् । बुधबार व्यास नगरपालिका–४ बागबजारमा आयोजित चुनावी कार्याक्रमलाई सम्बोधन गर्दै नेता पौडेलले सरकारको नेतृत्व गर्न अत्यधिक मत दिएर विजयी गराउन आम मतदातासँग आग्रह गरे ।
तनहुँको क्षेत्र नम्वर– १ बाट नेपाली कांग्रेसका नेता रामचन्द्र पौडेल, नेकपा एमालेका एक बहादुर राना र स्वतन्त्रबाट उठेका गोविन्दराज जोशी बीच त्रीपक्षीय प्रतिस्पर्धा हुने भएको छ ।
गठबन्धनको सुत्रधार म नै हुँ, गठबन्धनकै कमाण्डर मलाई नै बनाईएको छ मलाई प्रधानमन्त्री बनाउन सबैलाई मान्य हुन्छ’ उनले भने । कार्यकारी पदमा पुगेर जनताको सेवा गर्न उम्मेदवार बनेको नेता पौडेलको भनाई थियो । तनहुँ जिल्लाले नेपालकै नेतृत्व दिने हैसियत बनाएको पौडेलको भनाई थियो ।
‘यो हैसियत तपाईहरु जस्तै उत्साहित मतदाताहरुको आशिर्वादले प्रेरणा र सहयोगले हैसियत निर्माण भएको हो, पौडेलले भने । देशमा सूशासनको खाँचो रहेको र त्यसलाई कायम गर्ने नैतिक सामर्थ आफूसँग भएको पौडेलले बताए ।
पाैडेलकाे निर्वाचन क्षाेत्र तनहुँ १ मा चुनावी अंकगणित
देवघाट, आँबुखैरेनी र बन्दीपुर गाउँपालिका, भानु नगरपालिका र व्यासका १२ वटा वडा तनहुँ क्षेत्र नम्बर १ मा पर्छ । यो क्षेत्रको ४२ वडामा गत स्थानीय निर्वाचनमा एमालेभन्दा कांग्रेस एक्लै पनि १२ हजार बढी मतले अगाडि छ ।
एमालेका वडाध्यक्षका उम्मेदवारले २० हजार ८७९ मत पाएका थिए । कांग्रेसले ३३ हजार १०६ मत प्राप्त गर्दा गठबन्धनमा आबद्ध दल नेकपा माओवादीले ८ हजार १२४ र एकीकृत समाजवादीले ८९२ मत ल्याएको थियो । यी तीन दलले पाएको मत ४३ हजार ७५२ छ । वडामा गठबन्धन र एमालेबीचको मतान्तर झन्डै २३ हजार बढी छ । राप्रपाका उम्मेद्वारले एक हजार ६३० र स्वतन्त्र उम्मेदवारले तीन हजार ९९२ मत पाएका थिए ।
स्थानीय तहमा कांग्रेसले पाएको मत मात्रै कांग्रेस वरिष्ठ नेता रामचन्द्र पौडेलको पोल्टामा पर्ने हो भने उनको सहजै जीत हुने देखिन्छ । तर, पौडेल ढुक्क भएर बस्ने भने अवस्था छैन ।
नेपाली कांग्रेसका महासमिति सदस्य पूर्णबहादुर गुरुङले हालै कांग्रेस परित्याग गर्दै एमालेमा प्रवेश गरेर तनहुँ १ (ख) को उम्मेद्वार बनेका छन् । उनले पनि कांग्रेस विशेष गरी जनजाती समुदायको भोट काट्ने सम्भावना बलियो छ ।
एक पटक जसरी पनि देशको प्रधानमन्त्री बन्ने उदेश्य बोकेर लगभग अन्तीम चुनावी मैदानमा होमिएका पौडेलले यसपटक तनहुँ क्षेत्र नम्बर १ का जनतालाई पनि त्यही सपना देखाइरहेका छन् । गठबन्धनको मत स्वभाविक हिसाबले एमालेको भन्दा धेरै अगाडि भएकाले पौडेलको जीत हुने आंकलन गरिएको छ भने जोशीको मत एमालेलाई नगइ आफैंलाई जाँदा पौडेललाई नै फाइदा हुने तनहुँ काग्रेसका सचिव लक्ष्मीभक्त खनालकाे आँकलन छ ।
गठबन्धन बलियो भएकाले पौडेललाई चुनाव जित्न सहज
स्थानीय तहको तथ्यांक हेर्दा पौडेललाई निर्वाचन जित्न सहज देखिएको छ । स्थानीय तहको निर्वाचनमा धेरै पालिकामा कांग्रेका मेयरका उमेदवार विजयी भएकाले पौडेललाई चुनाव जित्न सहज भएको जिल्ला सचिव खनालले बताए ।
‘यो क्षेत्रमा पाँच वटा पालिका पर्छ । त्यसमा कांग्रेसले तीनवटा पालिका जितेको छ भने एउटामा माओवादीले जितेको छ । त्यो नतिजा हेर्दा पनि गठबन्धन बलियो देखिन्छ । त्यसैले पौडेललाई चुनाव जित्न सहज छ,’ उनले भने ।
गत स्थानीय तहमा वडाध्यक्षले पाएको मतलाई आधार बनाउँदा गठबन्धन दल २१ हजार नौसय ४२ मतले अगाडी देखिएको छ । गत निर्वाचनमा कांग्रेसका वडाध्यक्षले ३५ हजार तीन सय ४२, माओवादीले दश हजार चार सय ९७, एकीकृत समाजवादीले नौ सय एघार मत प्राप्त गरेको थियो ।
एकीकृत समाजवादीको सबै पालिकामा उम्मेदवारी नदिएका कारण मत पनि कम आएको हो । त्यस्तै नेकपा एमालेले २४ हजार आठ सय आठ मत ल्याएको थियो भने राप्रपाले दुई हजार ३० मत प्राप्त गरेको थियो । स्वतन्त्र र अन्य साना दलले पनि केही मत प्राप्त गरेका थिए । यही वडाध्यक्षले पाएको मतलाई आधार मान्दा गठबन्धन दल धेरै मतले अगाडी छ । यही कारण पनि बरिष्ठ नेता पौडेल जित निकाल्ने सम्भावन रहेकाे छ ।
