सर्लाही, १० कात्तिक २०८२ सोमवार । मधेस प्रदेशको सर्लाही जिल्लाको बागमती नगरपालिका–४ मा निर्माण गरिएको देशकै सबैभन्दा ठूलो मानवनिर्मित ‘भरत ताल’ अहिले आन्तरिक र बाह्य पर्यटकको घुँइचो बढेको छ । चुरे पर्वतको काखमा, कलकल बग्ने बागमती नदीको किनारमा अवस्थित यो तालले मधेसको पर्यटन नक्सा नै बदलिदिएको छ।
१ सय २१ बिघा क्षेत्रफलमा फैलिएको भरत तालको गहिराइ १५ देखि ४५ फिटसम्म रहेको छ। तालको नीलो पानीमा त माथि परावर्तित चुरे पर्वतको छायाँ, अनि तालमा सरर गुड्ने मोटर बोट र मिनी क्रुज — यी सबै दृश्यहरूले पर्यटकको मनमा स्वर्गीय अनुभूति जगाउँछन्।
गर्मी याममा यहाँ जेटबोटमा रमाइलो गर्ने, फोटो खिच्ने, टिकटक बनाउने र परिवारसहित बोटिङको आनन्द लिनेहरूको भीड लाग्ने गरेको नगरपालिकाका कर्मचारी रुद्र दाहालले प्रहार समाचारलाई बताए । तालमा ३५ सिट क्षमताको जेटबोटसहितका आकर्षक मिनी क्रुजहरूले अब मधेसमै समुद्री अनुभव दिन थालेका छन्। यसका साथै तालको सौन्दर्यको अबलोकन गर्दै अहिले भरत ताल नजिकै नयाँ मनोरञ्जनात्मक साहसिक खेल “स्काइ साइक्लिङ” सुरु गरिएको छ। स्थानीय स्तरमा पर्यटन प्रवर्द्धन र आन्तरिक पर्यटक आकर्षित गर्ने उद्देश्यले पालिकाले सञ्चालनमा ल्याएको यस खेलले हाल सर्वसाधारणमा उत्साह जगाएको बताइन्छ ।
यस्तै ताल नजिकै बच्चाका लागि बिभिन्न मनोराजनात्मक रेड चढ्न पाइने, मोटसाइकल, झुला, चिप्लेटी, घोडा सवारी, फोटो खिच्ने लगायतका सुबिधाहरुले थप आकर्षण बढाएको पाइन्छ ।
स्काइ साइक्लिनिङमा सहभागीले विशेष सुरक्षात्मक बेल्टमेट र हेल्मेट लगाएर, हावामा तन्निएको बलियो स्टिलको तार (steel cable) माथि र साइकलमा चढ्ने गर्छन्। उक्त तार दुईवटा टावर वा प्लेटफर्मबीच तन्निएको हुन्छ । अहिले त्यहाँ दुई वटा स्काइ साइकल सञ्चालनमा रहेका छन्।
६० करोडभन्दा बढी लगानी, ‘मिनी नेपाल’ निर्माणको सपना
नगरपालिकाले ताल र वरपरको संरचना निर्माणमा ६० करोड रुपैयाँभन्दा बढी खर्च गरिसकेको छ। तालको नजिकै सुमेरू पर्वत, शिवमूर्ति र मिनी नेपाल निर्माण गर्ने योजना अघि बढाइएको छ, जसले यस क्षेत्रलाई बहुउद्देश्यीय पर्यटन केन्द्र बनाउने लक्ष्य राखिएको नगरपालिकाले जनाएको छ।
